नेपालगन्ज- भारतको चिकित्सा क्षेत्रको प्रतिष्ठित म्याक्स सुपर विशेषज्ञ अस्पतालले नेपाली चिकित्सकहरुसँग बिहिवार नेपालगन्जमा ‘निरन्तर चिकित्सा शिक्षा’ बारे कार्यशाला गरेको छ । केही महिनाअघि उत्तरप्रदेशको राजधानी लखनउस्थित सहारा अस्पतालको पूर्ण स्वामित्व लिइसकेपछि म्याक्सले ‘निरन्तर चिकित्सा शिक्षा’ कार्यक्रमलाई सञ्चालन गरेको हो ।
म्याक्सका एभिपी तथा युनिट हेड प्रमित मिश्राले विश्वस्तरमा भइरहेको चिकित्सा क्षेत्रको ज्ञान, प्रविधि र नवप्रवर्तनका बारेमा अनुभव साटासाट गर्न कार्यशाला आयोजना गरिएको बताए । ‘हामीले नजिकै ठूलो लगानीमा विश्वस्तरीय अस्पताल सञ्चालनमा ल्याएका छौं, जहाँ सहुलियतमा सुपर स्पेसियलिस्ट सेवा उपलब्ध गराउँदैछौं, उनले भने, ‘आम नेपालीलाई जानकारी गराउन पनि यो कार्यक्रम आयोजना गरिएको हो ।’ साथै उनले नेपाल हेर्ने छुट्टै डेस्क व्यवस्थापन गरेको जानकारी दिए । उनले भने, ‘त्यहाँ नेपाली भाषामै सहजीकरण गरिदिनेदेखि नेपाली रुपैयाँबाट काम चल्नेछ ।’
नेपालगन्ज उपमहानगरपालिकाका मेयर प्रशान्त बिष्ट र बाँकेका प्रमुख जिल्ला अधिकारी खगेन्द्रप्रसाद रिजालको उपस्थितिमा म्याक्स सुपर विशेषज्ञ अस्पताल लखनउका वरिष्ठ चिकित्सकहरुले आ आफ्ना विषय विज्ञताको प्रस्तुतिकरण दिएका थिए । नेपाल मेडिकल एसोसियसन नेपालगन्ज च्याप्टरको सहकार्यमा भएको कार्यशालामा म्याक्सका निर्देशक तथा प्रमुख मेडिकल अनकोलोजिस्ट डा आलोक गुप्ताले क्यान्सर उपचारमा अत्याधुनिक प्रविधियुक्त सेवासुविधा म्याक्समा रहेकाले यसको लाभ निकटवर्ती सेवाग्राहीले उठाउन सक्ने बताए । उनले आफ्नो प्रस्तुतिमा क्यान्सर जोखिमयुक्त रोग भएपनि पछिल्लो समय त्यसको उपचार सम्भव भएको बताउँदै आफूले कैयन निकै चुनौतिपुर्ण रोग निदान गरेको अनुभव सुनाए ।
म्याक्सका अर्का निर्देशक तथा हेड अफ डिपार्टमेन्ट डा. आदित्य के शर्माले रोबोटिक सर्जरीले बिरामीको उपचारमा कसरी रुपान्तरणकारी प्रभावबारे तथा न्यरोसर्जरी विशेषज्ञ डा मनु रस्तोगीले नयाँ प्रविधिबारे चर्चा गर्दै स्पाइन सर्जरीमा आएका नयाँ परिवर्तनबारे प्रकाश पारे । नेपाल मेडिकल एसोसियसनका अध्यक्ष डा विनोद थापाले म्याक्सको यो पहल प्रंशसनीय भएको बताए । कार्यक्रममा करिब १५० चिकित्सकहरुको उपस्थिति थियो ।
म्याक्स हेल्थ केयर इन्स्टिच्युट भारतको सबैभन्दा ठूलो स्वास्थ्य सेवा प्रदायक संस्थाहरुमध्ये एक हो ।
कर्णाली समय । २१ भाद्र २०८१, शुक्रबार १२:१६