श्रमाधान मेलाले आन्तरिक रोजगारी प्रर्वद्धनको आधार तयार पार्नेछ : श्रममन्त्री अर्याल

सुर्खेत- श्रम, रोजगार तथा सामाजिक सुरक्षामन्त्री डोलप्रसाद अर्यालले मन्त्रालयले आयोजना गरेको श्रमाधान रोजगार मेलाले आन्तरिक रोजगारी प्रर्वद्धनको आधार तयार पार्ने बताए ।

शुक्रबार कर्णाली प्रदेश सुर्खेतमा आयोजित रोजगार मेलाको उद्घाटन समारोहलाई सम्बोधन गर्दे मन्त्री अर्यालले मेलाले रोजगारदाता र श्रमिक बीच मध्यस्थकर्ताको भूमिका खेल्ने बताएका हुन् । मन्त्री अर्यालले अथाह सम्भावना रहेको कर्णाली प्रदेशको विकासका लागि संघीय सरकारले ढोका मात्रै ढकढकाउने काम गर्ने बताए । “कर्णाली विकासको ढोका खोल्ने काम आफैले गर्नेछ,” उनले भने ।

कर्णाली प्रदेशका  मुख्यमन्त्री यमलाल कँडेलले श्रमिक र रोजगारदाता बीच सेतुको रुपमा आयोजित श्रमाधान रोजगार मेलाको आयोजना गरेको प्रति मन्त्रालयलाई धन्यवाद दिए । मेलाले सरोकारवालाई एकै ठाउमा ल्याएर रोजगारीको अवसर प्रदान गर्ने उद्धेश्यले आयोजना गरिएको यो श्रमाधान मेलाको पूर्ण सफलताको पनि कामना गरे ।

मुख्यमन्त्री कँडेलले नेपालको युवा शक्तिलाई मुलुक भित्र टिकाई राख्न नेपालको शिक्षा प्रणाली र लगानीमा नीति सुधार ल्याउनुपर्ने बताए । यद्यपी कर्णाली सरकारले आगामी आर्थिक वर्षको नीति तथा कार्यक्रममा रोजगारी र उद्यमशीलताका लागि धेरै योजना अघि सारेको पनि बताए । त्यस्तै, कर्णाली प्रदेशका मन्त्री दुर्गा बहादुर राउतले नेपाली नागरिकसँग परम्परागत सीप भएपनि त्यसले मान्यता नपाउँदा नेपाली श्रमिकको सीपको मूल्यांकन नभएको बताए । “नेपाली युवासँग डोको, राडी, पाखी बुन्ने सीप छ । यो सीप इन्जियनियरको भन्दा कम छैन । तर, यो सीपले प्रमाणपत्र पाउन सकेको छैन । जसका कारण सीप भएका नेपाली युवाको पहिचान र मूल्यांकन हुन सकेको छैन,” उनले भने ।

वीरेन्द्रनगर नगरपालिका मेयर मोहनमाया ढकालले वीरेन्द्रनगरको पार्क, बगैचा र चोकमा थुप्रिएका युवाको भिड, उनीहरुको सामाजिक सन्जालमा सजिएका फोटा र टिकटले हाम्रा लागि नीति बनाउन भनेर सरकारलाई घचघचाई रहेको बताईन् ।  उनले भनिन, कर्णाली आफैमा सम्पन्न छ, त्यसैले आगामी दिनमा कर्णाली दुर्गम र गरिब छ भन्ने भाष्य परिवर्तन गर्नुपर्छ । स्थानीय सरकारसँग मिलेर केन्द्रिय सरकारले आयोजना गरेको श्रमाधान रोजगार मेलाले आगामी दिनमा रोजगारी सृजनाको अवसर र आर्थिक समुन्नती ढोका खोल्नमा सहयोग पुग्ने विश्वास लिएको उनको भनाई थियो ।

मेलामा सरकारी तथा नीजि क्षेत्रको गरी ४० वटा स्टल राखिएका छन् । त्यस्तै, विभिन्न  कार्यशाला, सास्कृतिक कार्यक्रम पनि आयोजना गरिने बताएको छ । मेला सुर्खेत वीरेन्द्रनगरको सिटीहलमा भोलिसम्म सञ्चालन हुनेछ ।