सुर्खेत–नेकपा एमालेको प्रथम कर्णाली प्रदेश अधिवेशनबाट गुलाबजंग शाह अध्यक्षमा निर्वाचित भएका छन् । असोज १० गते उद्घाटन भएको अधिवेशनले मतदानबाट नेतृत्व चयन गरेको हो । ३६९ मत ल्याएर शाह विजयी हुँदा उनका निकट प्रतिष्पर्धी मिनबहादुर शाहीले २०७ र अर्का उम्मेदवार प्रकाश रोकायाले ४ मत प्राप्त गरे ।
सल्यानका शाह एमाले पोलिटब्युरो सदस्य थिए । प्रदेश अध्यक्ष कार्यकारी र पोलिटब्युरो बैठकमा भाग लिन पाउने भएपछि उनी प्रदेशको नेतृत्व गर्ने आकांक्षासहित प्रतिनिधि चुनिएका थिए । सम्पन्न मतपरिणाम अनुसार पदाधिकारीमा शाहकै टिम फराकिलो मतान्तरसहित निर्वाचित भएको छ । उपाध्यक्षमा टेकराज पछाई, सचिवमा धु्रवकुमार शाही, सहसचिवमा रविन्द्रराज शर्मा र रमेशकुमार शाही निर्वाचित भएका छन् । लेखा आयोगको अध्यक्षमा पनि शाह प्यानलकै जीतबहादुर मल्ल निर्वाचित भएका छन् ।
आइतबार भएको मतदानमा कुल ६१६ मतदातामध्ये ६०४ मत खसेको थियो । खसेको कुलमत मध्ये ९ म बदर भएको थियो भने ५९५ मत सदर भएको हो । १३५ सदस्यीय प्रदेश कमिटीमध्ये ४४ जना सदस्यहरु सर्वसम्मत निर्वाचितहुँदा ८६ मतमा मतदान भएको थियो ।
बुधबार नवनिर्वाचित पदाधिकारी र सदस्यहरूले शपथ लिएका छन् । प्रदेश अध्यक्ष गुलावजंग शाहलाई प्रदेश अधिवेशन निर्वाचन कमिटीका निर्वाचन प्रमुख मातृकाप्रसाद खनालले शपथ खुवाएका हुन् । शाहले सपथ लिए लगत्तै पदाधिकारी र सदस्यलाई शपथ खुवाएका हुन् ।
शाहलाई एमाले स्थायी कमिटी सदस्य यामलाल कँडेल र शाहीलाई अर्का स्थायी कमिटी सदस्य गोरखबहादुर बोगटीको समर्थन थियो । शाहीको टिममा उपाध्यक्ष लालबहादुर महतारा, सचिवमा रुद्र शाही, उपसचिवमा पद्मा खड्का प्रतिष्पर्धामा थिए । अध्यक्ष केपी शर्मा ओलीले सर्वसम्मत गर्न, सर्वसम्मत नभए प्यानल नबनाई चुनावी प्रतिष्पर्धा गर्न निर्देशन दिएपनि दुवै टिमले अन्ततः प्यानल निर्माण गरेका थिए ।
को हुन् शाह ?
२०४० सालबाट अनेरास्ववियु पाँचौंमा आवद्ध भएर राजनीतिमा होमिएका नवनिर्वाचित अध्यक्ष शाह हाल पार्टीको पोलिटव्यूरो सदस्यको जिम्मेवारीमा थिए । २०५६ मा तत्कालिन नेकपा एमाले विभाजन पछि बनेको नेकपा मालेमा आबद्ध भएका शाह मालेको तेस्रो अधिवेशनबाट सल्यान जिल्ला कमिटी सचिव बनेका थिए । २०५७ मा तत्कालिन राष्ट्रिय युवा संघको केन्द्रीय सचिवालय सदस्य बनेका शाह २०६६ मा तत्कालीन नेकपा एमालेको अञ्चल कमिटी सदस्यको जिम्मेवारीमा पुगेका थिए । उनी एमालेको ९ औँ महाधिवेशनबाट केन्द्रीय सदस्यमा निर्वाचित भएका थिए ।
शाह २०७४ मा तत्कालिन नेकपा माओवादीसँग बनेको वामगठवन्धका तर्फबाट सल्यान क्षेत्र नम्बर १ प्रदेशसभा (ख) बाट पहिलो पटक संसदीय राजनीतिमा प्रवेश गरेका नेता हुन् । एमाले संसदीय दलको प्रमुख सचेतक रहेका शाह तत्कालिन माओवादी केन्द्रसँग एकता भएपछि बनेको नेकपाको पनि प्रमुख सचेतकको रुपमा काम गरेका थिए । गत ४ मंसिर २०७९ मा सम्पन्न प्रदेशसभा निर्वाचनमा दोस्रो पटक सल्यान क्षेत्र नम्बर १ (ख) बाट संसदीय निर्वाचनमा होमिएका शाह नेपाली कांग्रेसका सुरेश अधिकारीसँग पराजित भएका थिए ।
कर्णाली समय । १७ आश्विन २०८०, बुधबार १५:०४