काठमाडौं- दैलेखमा जन्मिएकी चर्चित लोकगायिका तथा मोडल भावना आचार्यले जीवनदर्शन र सामाजिक सन्देश बोकेको नयाँ लोकगीत ‘खाने भातै हो, जाने घाटै हो’ सार्वजनिक गरेकी छन् । भावना आचार्यको आधिकारिक युट्युब च्यानलमार्फत बिहीबार साँझ सार्वजनिक गरिएको गीतमा गायिका आचार्यसँगै गायक प्रताप दासको स्वर रहेको छ ।
गीतको शब्द, संगीत तथा प्रस्तुति स्वयं भावना आचार्यकै रहेको छ । सार्वजनिक हुनुअघि नै गीतको प्रोमो सामाजिक सञ्जालमार्फत सार्वजनिक गरिएको थियो ।
‘खाने भातै हो, जाने घाटै हो’ बोलको गीतले धन–सम्पत्तिप्रतिको मोहभन्दा मानवीय सम्बन्ध, असल कर्म र सदाचारलाई प्राथमिकता दिनुपर्ने सन्देश दिएको छ । लोकभाकासँग आधुनिक संगीत संयोजन गरिएको गीतमा जीवनको वास्तविकता र सामाजिक चेतनालाई कलात्मक रूपमा प्रस्तुत गरिएको छ । म्युजिक भिडियोमा कलाकारहरूको जीवन्त अभिनय, ग्रामीण परिवेश र सन्देशमूलक दृश्य संयोजन गरिएको छ । भिडियोको निर्देशन तथा छायांकन पक्ष पनि गीतको भावअनुसार प्रस्तुत गरिएको देखिन्छ ।
लामो समयदेखि काठमाडौंमा रहेर लोकदोहोरी गायन र मोडलिङ क्षेत्रमा सक्रिय भावना आचार्यका ‘बग्ने खोला बगी को’, सोच सोच केटी हो नत बने हिरोइन, चट्ट रातो सारीमा, टिकटक चलाउने लगायतका गीत यसअघि पनि दर्शक–श्रोतामाझ लोकप्रिय बनेका छन् । पछिल्लो गीतमार्फत उनले मनोरञ्जनसँगै समाजलाई सकारात्मक सन्देश दिने प्रयास गरेकी छन् । गीत सार्वजनिक भएसँगै युट्युब तथा सामाजिक सञ्जालमा श्रोताहरूबाट सकारात्मक प्रतिक्रिया आउन थालेको भावना बताउँछिन् ।
भिडियो हेर्न यहाँ क्लिक गर्नुहोस ।
कर्णाली समय । २६ असार २०८३, शुक्रबार ११:१२