सुर्खेत- कर्णाली प्रदेशमा मनसुनजन्य विपद्मा परी पछिल्लोपटक ५ जनाको मृत्यु भएको छ । बाढी, पहिरो, चट्याङलगायतका घटनामा परी उनीहरूको मृत्यु भएको प्रहरीले जनाएको छ ।
प्रदेश प्रहरी कार्यालयका अनुसार असार १७ गते जाजरकोटमा पहिरोले घर भत्किँदा भेरी नगरपालिका–५, ईब्रा गाउँका ६ वर्षीय प्रिन्स विकको मृत्यु भएको थियो । शुक्रबारदेखि परेको अविरल वर्षाका कारण खोलामा पानीको बहाव बढेसँगै बाढीले बगाउँदा सुर्खेतको सिम्ता गाउँपालिका–९, कि ७ वर्षीया मनिषा वादीको मृत्यु भयो । गाउँको कुदाल खोलामा आएको बाढीले उनलाई बगाएको थियो ।
मनसुन सक्रिय भएयता प्रदेशभर १४२ वटा विपद्का घटनाहरू भएका छन् । उक्त घटनामा परी ५ जनाको मृत्यु र १७ जना घाइते भएका हुन् । त्यस्तै ७२ वटा पशु चौपायाको मृत्यु भएको छ भने १३४ वटा भौतिक पूर्वादारहरूमा क्षति पुगेको छ । प्रहरीका अनुसार उक्त अवधिका विपद्का घटनामा अनुमानित १ करोड ३६ लाख २० हजार बराबरको आर्थिक क्षति भएको छ ।
यहाँको अधिकांश भू–भाग पहाडी क्षेत्र भएकाले यहाँ पहिरोको जोखिम सबैभन्दा बढी रहेको छ । कर्णालीमा यस वर्ष ५० हजार ४ सय ६४ जनसङ्ख्या मनसुनजन्य विपद्बाट प्रभावित हुन सक्ने आकलन गरिएको छ ।
कर्णाली समय । २६ असार २०८१, मंगलवार ११:२८